217
GAL, rechterlijk archief inv.nr. 79 deel M fol. 285.
Compareerden voor den ondergeschreven schepenen der stadt Leyden, Jan Ellis, wolcammer, out omtrent 50 jaren, ende Rogier Wilson, greynwercker, out omtrent 34 jaren, beyde wonende binnen deser stede. Ende verclaerden ende affirmeerden bij solemnelen eede hen wettelicken gestaeft ende afgenomen ter requisitie ende instantie van Ridtsart Mestersz., mede wolcammer, waerachtich te wesen dat sij comparanten omtrent den tijt van zeven jaren herwaerts goede kennisse hebben gehadt aen de voorn. requirant ende geduyrende deselve tijt met denselven requirant binnen deser stede goede conversatie ende vrientschap gehouden hebben, sulx dat sij comparanten weten dat den requirant hem in allen sijnen handel ende wandel tegens hen comparanten, mitsgaders tegens eenen yegelicken geduyrende de voorgemelde zeven jaren eerlicken ende vromelicken gedragen heeft, gelijc een deuchdelic jongman betaemt ende toestaet, sonder oyt van eenige quade daden, dat sij comparanten weten, berucht off befaemt, veel min daerover achterhaelt te sijn. Wijders niet verclarende. So waerlic most hen comparanten beyde Godt Almachtich helpen. Actum den 20en marty 1600negentien.
H.P. Codijck
G. van Lanschott
Aantekening in de marge:
nota: Dat van dese acte een dubbelt in Latijnscher tale is uytgegeven, waervan 't translaet hangt aen de coppel van de minuten der attestatiën.
